திருவள்ளுவர் யாரை இறைவன் என்று குறிப்பிடுகிறார்?

"அகர முதல எழுத்தெல்லாம் ஆதி

 பகவன் முதற்றே உலகு"

திருவள்ளுவர் எங்கள் மதத்தை சார்ந்தவரே என்று இந்து மதம், புத்த மதம், சமண மதம், ஜைன மதம் என்று பல மதத்தை சேர்ந்தவர்கள் கூறுகிறார்கள் அந்த வரிசையில் இப்பொழுது கிறிஸ்துவ மதம் சேர்ந்துள்ளது... 

பொதுவாக பார்த்தால் ஏன் திருவள்ளுவருக்கு இவ்வளவு பேர் சொந்தம் கொண்டாடுகிறார்கள் என்றால், திருவள்ளுவர் திருக்குறளில் சொல்லி உள்ள கருத்துக்கள் எம் மதத்தை சார்ந்தவையே என்று பெருமை பாராட்டி கொள்ளவே அல்லாமல் வேறொன்றுமில்லை...

அப்படி பார்த்தால் எந்த மதத்திலும் சொல்லாத கருத்துக்களை கூட திருவள்ளுவர் சொல்லி உள்ளார் என்பதே உண்மை...

அவ்வளவு ஏன் கற்பனையில் வரையப்பட்ட அவரது உருவத்திற்கே வேட்டு வைப்பது போல் "மழுத்தாலும், நீட்டலும் தவறு" என்ற குறள் உள்ளது, அதாவது தலை முடியை மழுத்தாலும், தாடியை நீட்டலும் தவறு என்ற குறள் உள்ளது...

குறள் 280:

மழித்தலும் நீட்டலும் வேண்டா உலகம்
பழித்தது ஒழித்து விடின்.

"உலகத்தாரின் பழிப்புக்கு உள்ளாகும் செயல்களைத் துறக்காமல் ஒரு துறவி, தனது தலையை மொட்டையடித்துக் கொண்டோ, சடாமுடி வளர்த்துக் கொண்டோ கோலத்தை மட்டும் மாற்றிக் கொள்வது ஒரு ஏமாற்று வித்தையே ஆகும்."

மற்ற மதத்தினராவது பரவாஇல்லை கிறிஸ்துவர்கள் ஒரு படி மேலே சென்று தோமா தான் திருவள்ளுவருக்கே பாடம் சொல்லி கொடுத்தார், தோமா சொன்ன போதனையில் தான் திருவள்ளுவரே திருக்குறள் எழுதினார், திருவள்ளுவருக்கு சுயமாக சிந்திக்கும் திறன் இல்லை என்பது போல் சொல்கிறார்கள்.

ஆனால் வள்ளுவர்,

எல்லா உயிர்களிடத்திலும் நீக்கமற இருப்பவர் இறைவன் என்ற இந்து மத கருத்தும், ஆசையே துன்பத்திற்கு காரணம் என்ற புத்த மத கருத்தும், ஒரு கன்னத்தில் அறைந்தால் மறு கன்னத்தை காட்டு என்ற கிறிஸ்துவ மத கருத்தும், ஒருவன் தன் வருமானத்தில் ஒரு சிறிய பங்கு விளம்பரமின்றி ஏழை, எளியவர்க்கு உதவி செய்ய வேண்டுமென்ற முஸ்லீம் மத கருத்தும், பிற உயிர்களை கொள்ளாது வாழ்பவனுடைய வாழ்க்கையே சிறந்த அறம் என்ற ஜைன மத கருத்து என அனைத்து மத கருத்துக்களை கூறி உள்ளார்...

வள்ளுவர் இந்து, கிறிஸ்து, முஸ்லீம், புத்த, ஜைன மதத்தவரின் பொதுவான கருத்துகளை விளக்கியுள்ளார். திருக்குறள் தனிப்பட்ட மனிதனுக்கோ, மதத்திற்கோ, நாட்டிற்கோ அல்லாமல் நாடு, இனம், மொழி, சமயம் எல்லாவற்றையும் கடந்து மக்களாய்ப் பிறந்த அனைவருக்கும் எக்காலத்திற்கும் இயைந்த கருத்துகளைக் கூறுகிறது.

சரி திருவள்ளுவர் கடவுளாக குறிப்பிடுபவர் யார் என்று ஆராய்ந்தால் அதற்கு  முதல் அதிகாரம் அதாவது கடவுள் வாழ்த்து அதிகாரத்தில் முதல் குறளே அதற்கு சாட்சி...

"அகர முதல எழுத்தெல்லாம் ஆதி
  பகவன் முதற்றே உலகு."

மேலே உள்ள குறளின் பொருள் என்னவென்றால் "எழுத்துக்கள் எல்லாம் அகரத்தை அடிப்படையாக கொண்டிருக்கின்றன. அதுபோல உலகம் கடவுளை அடிப்படையாக கொண்டிருக்கிறது" என்பதே பல அறிஞர்களின் கருத்தாகும்.

ஆனால் திருவள்ளுவர் நேரடியாகவே இறைவனை குறிப்பிட்டு இருக்கிறார் "ஆதி பகவானை முதலாக கொண்டதே உலகம் என்று" இங்கு நான் ஆதி பகவான் என்று யாரை குறிப்பிடுகிறார் என்று அனைவருக்கும் தெரியும். ஆம் 

"சூரியனே"

சூரிய பகவானை முதலாக கொண்டதே உலகம் என்று திருவள்ளுவர் கூறுகிறார். ஒரு காலத்தில் பல நாடுகளில் சூரிய பகவானை கடவுளாக வணங்கியது நாம் அறிந்ததே. இதற்கு சில விளக்கங்களை கொடுக்கிறேன்.

ஆதி என்பது சூரியனை தான் குறிக்கிறதா என பலருக்கு சந்தேகம் வரலாம். ஆம் அது சூரியனையே குறிக்கிறது என்பதற்கு உலகமே ஒன்றுபடக்கூடிய சில ஆதாரங்களை கூறுகிறேன்.

நம் தமிழ் மொழியில் வாரத்தின் முதல் நாளை குறிக்கக்கூடிய சொல் "ஞாயிறு"  என்பது அனைவரும் அறிந்ததே. சூரியனுக்கு ஆதவன், கதிரவன், ஞாயிறு, என்று பல பெயர்கள் தமிழில் உண்டு. ஞாயிறு என்ற சொல்லில் "ஞா" என்றால் நடுவில் தொங்கிகொண்டு என்பது பொருள். யிறு என்றால் இறுகப் பற்றிக் கொண்டுள்ள கிரகங்கள் என்று பொருள். எனவே நடு நாயகமாக விளங்கும் சூரியன் மற்றைய கிரகங்களைப்பற்றிக் கொண்டுள்ளது. அவனின் பிடிதளர்ந்தால் உலகத்தின் கதியும் அதோகதிதான். எனவே சூரியனே வாரத்தின் முதல்வனாக திகழ்கிறான்.

தெலுகு மொழியில் நேரிடையாகவே வள்ளுவனுடைய வார்த்தை வாரத்தின் முதல் நாளை குறிக்கக்கூடிய சொல்லாக உள்ளது. அது தான் "ஆதி வாரம்" இங்கும் வாரத்தின் முதல்வனாக ஆதி (சூரியன்) என்பவன் திகழ்கிறான்.  ஹிந்தியிலும் கூட வாரத்தின் முதல் நாள் "ஆதிவார்" என்றே கூறுகின்றனர்.

இதை விட ஒரு ஆச்சர்யம் என்னவென்றால் உலக பொது மொழியாக திகழும் ஆங்கிலத்திலும் கூட வாரத்தின் முதல்வனாக சூரியனே திகழ்கிறான் "சண்டே" (SUNDAY). என்ன ஒரு உலக ஒற்றுமை பாருங்கள். இந்த ஒற்றுமை தற்செயலாக நடந்ததா இல்லை, அனைத்தும் கோர்க்கப்பட்டதா என்று தெரியவில்லை.

எனவே திருவள்ளுவர் "ஆதி பகவான்" என குறிப்பிடுவது முதல்வனான (ஆதியாகிய) சூரியனையே என்பது புரிந்து இருக்கும்.

இது மட்டுமல்லாமல் அகத்திய முனிவர் இறைவனை ஜோதியாய், ஒளியாய் என்று குறிப்பிடுகிகிறார், வள்ளலார் அவர்கள் அருட்பெருஞ் ஜோதியே  தனி பெரும் கருணை என இறைவனை ஒளியாய் கண்டுள்ளனர்.

  

சூரியன் என்றால் இயக்குபவன் என்பது பொருள். உலகம் தோன்றுதற்கும்  ஒடுங்குதற்கும் காரணமானவன் சூரியன். உலக உயிர்கள் அனைத்தையும் அவனே வாழ வைக்கிறான். அவனால் ஒளியும் வெப்பமும் தோன்றுகின்றன. ஆதி மக்கள் கண் கண்டு வணங்கிய முதல் கடவுள் சூரியனே.

கோவலன் கொலையுண்ட போது கண்ணகி சூரியனைப் பார்த்து தாய்கறிச் செல்வனே! கள்வனோ என் கணவன் எனக் கேட்டதாக சிலப்பதிகாரம் கூறுகின்றது. பத்துப்பாட்டு நூல்களுள் ஒன்றான பட்டினப்பாலை என்ற நூலில் ஏழு குதிரைகள் பூட்டிய ஒன்றைச் சக்கரத் தேரில் பயணிக்கும் உருவமுடையவனாக சூரியன் சித்தரிக்கப்பட்டுள்ளான்.

கால தேவனும் சூரியனே. ஒவ்வொரு நாளும் சூரியன் உதிப்பதற்கு இடைப்பட்ட காலம் ஒரு நாள் எனப்படுகின்றது. ஒரு நாள் சென்றால் நமது ஆயுளில் ஒரு நாள் கழிந்து விடுகின்றது. அதனால்தான் நாள் என ஒன்று போல் காட்டி உயிர் ஈரும் வான் அது உணர்வார்ப் பெறின் என்றார் வள்ளுவர்.

ரோமாபுரியில் டிசம்பர் மாதம் 25 ஆம் திகதி சூரியனின் பிறந்த நாளாகக் கொண்டாடப்பட்டது. செளரம் சூரியனை முழுமுதற் கடவுளாகக் கொண்ட சமயமாகும். புராணங்களிலும் இதிகாசங்களிலும் சூரியனைப் பற்றி பல சம்பவங்கள் எடுத்துக் கூறப்பட்டுள்ளன. குந்திதேவியின் முதற் கணவன் சூரியன் என்று மகாபாரதம் குறிப்பிடுகின்றது.

எனவே திருவள்ளுவர் "ஆதி பகவன்" என கடவுள் வாழ்த்து பகுதியில் முதல் குறளில் குறிப்பிடுவது முதல்வனாகிய சூரியனையே.

திருவள்ளுவர் எம் மதத்தை சேர்ந்தவரே என பெருமை பாராட்டி கொள்ளாமல், அவர் எழுதிய திருக்குறள்களின்படி நடக்க முயற்சிப்போம்...

வாழ்க வள்ளுவர்! வாழ்க அவர் பெருமைகள்!!